向陽台語詩欣賞─杯底金魚盡量飼

杯底金魚盡量飼   

杯底不好，不好用來

飼金魚。金魚不是錢

換做金魚若是錢

杯底金魚讓我替你飼

三更半暝飲酒著划拳

八仙過海你上愛

我是獨鍾哥倆好

飲落去！管伊什麼大代誌

單操單操單──操啦

乞巧乞巧乞巧──啊

啊飲落去！你輸你飲

飲落去！我贏也是你來飲

一杯博感情，二杯套交情

三杯落腹，朋友兄弟免議論

四逢四喜，爽快上值錢

飲落去看覓：杯底無金魚

金魚走何去？置在腹肚內

想盡辦法奉待你，欲賺這筆錢

酒無夠？擱叫擱叫盡量叫

若愛查某，欲點幾個隨在你

咱此暝攏是日月人，不是

總經理，欲飲欲爽算本錢

講著生理──哈哈暫放一邊

親若兄弟囉，請裁算啦隨在你

這杯仰頭飲落去，哥倆好啊

你做關公，我就是白劉備

張飛彼邊暫時免管伊

我做生理一向講義氣

亦請你飲花──酒，亦陪你

划──酒拳，亦叫查某哈哈

來消遣你。請你毋通飼金魚

若有金魚且讓老細的來替你飼